投資講求信念

匯控逼近52周新高，連埋內銀帶動恒指升穿26000點阻力。不禁令我回想年初討論區一帖<我今年33歲，終於成功靠買滙控退休了>。

內容係: 「我揸咗的士11年，每月開足30日工，每日揸12個鐘，一個月平均儲蓄$17500，一夠錢就買匯控，唔理咩價位。世紀供股果期我手持5200股，到上個月終於買夠40000股，每個月收過萬蚊息，依家可以退休了！
我同阿媽住自置頹樓，一個月用幾千蚊就夠了，以後我可以做毒L，唔較鬧鐘起床，日日打機，上網，睇書，打波了，好開心！」

有不少人評論的士哥的策略:「一注獨贏」、如果買騰訊又如何如何、長線投資、財務自由等等。但我最配服，是的士哥的「信念」。

要知道不論股價高低都能堅持去買一隻股票是遠比想像中困難。人天生就很怕風險，擔心潮退無左條褲的人，其實遠比擔心牛市升市賺唔到錢的人多。君不見有大師「睇淡不做淡，睇好靠邊站」(黃國英今日文章這句真是佳句)，不論市淡市好，都不出手，永遠叫你小心風險。就好似打工仔同老闆講加人工，市好老闆話擔心將來環境差，市差就話而家環境差。

的士哥一於懶理，不論金融海嘯、青姐灑淚、世紀供股、歐債危機、英國脫歐、北韓核試....有理無理月供匯控。他的策略未必最優，但至少比所謂大師齋up從來沒有行動好。

投資講求信念，沒有信念，即使成手股王，想賺大錢亦難。有信念，手中沒有股王亦難阻其致富。

經歷過金融海嘯，老實說陰影仍在。最好的公司都可以股價腰斬，自己都變得很保守很怕自己成為潮退無褲著的人。的士哥又再一次提醒我，要對有能力創造價值的公司有信念，股票唔係一張炒來炒去的紙，背後確確實實係營運緊的一盤生意。26000點, 27000點又何如，營商環境未變，不應先天下之憂而憂。