長實搞飛機租賃(上)

長實宣布以26.257億美元(約204.8億港元)分別向GECAS, BOC Aviation, JSA及MCAP收購60架飛機，大搞飛機租賃，一連兩篇首先講下長實的生意模式，再同中國飛機租賃(1848)比較一下，睇下有無得做。

長實地產起家，看似與航空業風馬牛不相及，但其實暗合誠哥發達之方程式。要理解單「勺」，就要先明白誠哥發達方程式。

誠哥是財技高手，其發達方程式簡單黎講，就是利用長實、和黃的超靚仔資產負債表及信貸評級借錢、發債去買現金流極佳的資產，例如房地產、發電廠、電訊及停車場等(資本投入少，處於淨現金流流入狀態)。長實、和黃賺取的其實是利差，即收入扣除利息成本，並以槓桿將回報放大。

有睇開長實盤數就知道，誠哥投資項目，往往佔少於50%，例如今次搞飛機的聯營公司就只佔40%。就算是長和系自己做的項目，聯營公司持份亦會拆開成40:40:20之類。在會計上，持份少於50%的子公司會採用Equity Method，即係只會Book equity入去帳內(唔包子公司負債)，亦只包子公司盈利(唔包子公司收入)，這樣母公司(即長實)負債就會少D，淨利潤率就會高D (只包盈利不包收入)。所以你見到長實處於淨現金，但分分鐘項目以90% Leverage都唔係無可能。

高負債去買資產，短期會面對利息風險，但長線其實相當著數。因為通脹，資產及現金流會上升(因為有提價能力)，但負債卻是紋風不動(所以通脹是投資債券的最大敵人)而且愈來愈少(用產生的現金流還錢，好似買樓收租供咁)，這亦是大部份香港人買樓發達的原因。長實坐擁現金流，又可以利用現金流再投資，或出售升值資產，所以時間一長，可以累積相當財富。

不過，呢招只限誠哥所用，因為方程式的關鍵是平錢及借到大錢。借得貴及借唔得多都無用。一般人問銀行借錢買樓可以，但你話借錢買發電廠，相信銀行職員會踢你出門口。

飛機租賃是具現金流流入的資產，最近市場因為中國飛機租賃上市，多左留意呢個行業，咁究竟有無得搞? 請看下回分解。