輸錢是贏錢的必然成本

記得考CFA時，有一Part講投資心理，其中有一個特別深刻，叫"Risk Aversion"。人性惡輸愛勝，贏就快快止賺，輸就希望坐到返家鄉之日。

問人投資點先算係叻，大部份人覺得是長勝、常勝，很少人會從贏時贏幾多，輸時輸幾多去看。

據Y兄的Back test 結果，勝率同回報率有一種Trade-off 關係。例如，想要高勝率，只要每次賺少少就止賺，輸就死坐，勝率就自然會高。但聰明的Blog友，自然會想到，只要一兩次大的Drawdown，就可以將你好多次贏的獲利一次過輸突。所以，投資新手追求的是「勝率」，買認為是穩陣的股票，輸就死都唔止蝕，就算買中有得贏的股票，都未必補得上某一兩隻股票的大Drawdown。

「咁簡單啦，掉番轉，以後贏就死坐，輸就急急腳止蝕咪得」道理雖然易明，但這樣執行極度違返人性，試想像，如果一種交易策略是不斷輸錢(儘管每次輸好少)，你是否具備心理質素可以捱到大勝的一次? 相信很多人早已經質疑自己的策略是否可行。

投資就如籃球比賽，即使波神米高佐敦的公牛，也沒有可能一球不失地打出100:0的賽果。索羅斯的前CIO Scott Bessent 就曾經Comment過索佬的勝率可能三成都無，但索羅斯就有一句金句: 對與錯並不重要，最重要是對的時候贏幾多，輸的時候又輸幾多。

對於輸贏，Y兄給我還有一種看法:「出場比進場重要」。有人會認為，成功的投資在你買入的時候已經決定，買岩靚位個「勢」就在投資者身上，所以很多人喜歡撈低。但其實在你買入之後，你就已經失去控制權，市場可以選擇升或跌。投資者真正可以控制的其實是「出場」: 止蝕或止賺。止蝕控制自己的Drawdown，相反控制止賺的慾望坐利潤，「贏谷輸縮」正是上面談到的交易之道。